ZZ Top: Tónleikaferðalag og trylltur vísundur
Það er eitt að ferðast mörg þúsund kílómetra í tónleikarútu en svo er það allt annað að ferðast mörg þúsund kílómetra í tónleikarútu með hluta af dýragarði með í för. Það gerði hljómsveitin ZZ Top árið 1976.
Það er góðra gjalda vert að leggja mikið upp úr því að tónleikaferðalög verði sem eftirminnilegust. ZZ Top á eflaust einhvers konar met þar því hljómsveitin fór í tónleikaferðalag árið 1976 og hafði með sér eitt og annað sem þeim þótti einkenna Texas sérstaklega.
Hugmynd hljómsveitarmeðlima var að „fara með Texas“ út um öll Bandaríkin og þó svo að tónleikaferðalagið væri innan Bandaríkjanna þá kallaðist það samt „Worldwide Tour“. Tónleikarnir voru um 100 talsins og tók ferðalagið 18 mánuði.
Flóran og fánan
Ýmiss konar plöntur sem vaxa í Texas voru með í för og hafðar uppi á sviði. Má þar nefna kaktusa, eyðmerkurliljur og pálmaliljur (yucca). Og svo voru það stærri lífverurnar sem einnig voru með í för: Tamdir vísundar (buffalo), stórhyrnd texasnaut, beltisdýr, pekkarísvín, skröltormar og hrægammar.
Dýrin höfðu öll verið þjálfuð og tamin til að vera uppi á sviði meðan á tónleikum stóð. Furðulegt uppátæki en jú, þetta gerðu þeir í ZZ Top.
Um 50 manns voru með í för til að sjá um dýrin og þar á meðal voru dýralæknar og sérlegur dýrahirðir að nafni Ralph Fisher sem einnig var líffræðingur.
Bílarnir undir allt sem fylgdi voru fjölmargir og hér eru myndir úr safni Fishers.
Vísundur fer á flakk
Þetta gat auðvitað ekki gengið snurðulaust fyrir sig. Ekki alveg. En ótrúlega vel gekk það nú samt.
Eftir tónleika í Pittsburgh í Pennsylvaníu, þann 12. júní 1976, voru mörg dýranna laus, af einhverjum ástæðum og gerðu nokkurn usla. Einkum var það annar vísundurinn sem gerði usla og skemmdi bæði sviðið og tónleikastaðinn frekar illa.
Billy Gibbons, einn hljómsveitarmeðlima, lýsti þessu svona:
„Þetta kvöld hafði einn vísundurinn fengið nóg. Hann stangaði glerbúrin sem skröltormarnir voru í og skyndilega voru kvikindin komin út um allt sviðið. Trommarinn okkar lagði til að við myndum spila eitthvað rólegt til að róa dýrin en það var auðvitað fáránleg hugmynd því flesir snákar eru heyrnarlausir. Við reyndum þetta ekki einu sinni heldur forðuðum okkur bara og rótararnir sáu um rest.“
Annars staðar rifjaði hann sama atvik upp og sagði að hann myndi seint gleyma þeirri sjón þegar dýraþjálfarinn elti trylltan vísundinn á golfbíl en eðli máls samkvæmt bar sá eltingarleikur takmarkaðan árangur.
Þetta var ekki einsdæmi. Vísundurinn varð stjörnuvitlaus þann 28. nóvember sama ár og slapp frá þeim sem áttu að annast hann. Litlu munaði að tryllti vísundurinn eyðilegði nokkrar af þeim níu limmósínum sem hljómsveitin var með á leigu. Bílunum hafði verið lagt við tónleikastaðinn og mátti minnstu muna að þeir færu allir á einu bretti í köku þegar stór skepnan tók á sprett.
Eitt og annað skemmdist en ekki hefur það verið tíundað og myndir af þessu æðiskasti skepnunnar hef ég hvergi séð.
Sagan segir að skröltormur hafi bitið tónleikagest upp við sviðið en ZZ Top hafi bara haldið áfram að spila eins og ekkert væri. Jú, svo mun víst hafa verið dálítið „vesen“ þegar kólna tók í veðri og skröltormarnir sannfærðir um að komið væri að því að leggjast í vetrardvala…
Þetta var stutt útgáfa af 18 mánaða tónleikaferðalagi ZZ Top og dýranna frá maí 1976 til desember 1977. Hafi einhver lesandi verið á tónleikum með þeim (af þessum 98 tónleikum sem haldnir voru) þá væri gaman að fá sögu!
Myndir:
Frá CBS:
Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.
Umræður um þessa grein