Verstappen: Virðingin fyrir Hamilton enn minni

Virðing Max Verstappens fyrir andstæðingnum Lewis Hamilton og keppnisliði hans hefur minnkað mikið á þessu keppnistímabili. Það viðurkennir Max fúslega í samtali við blaðamann ESPN.

Í samtalinu (eða zúmmtalinu) var Max spurður hvort  skoðun hans á Hamilton og Mercedes hefði breyst eftir baráttuna í ár: „Já, mjög mikið og alls ekki til betri vegar,“ svaraði hann.

Mismæli blaðamanns

Svo gerðist það, að blaðamaður mismælti sig og spurði hvort hann „myndi óska Max til hamingju“ ef hann ynni á sunnudaginn. Max hló og svaraði: „Já, ég mun óska sjálfum mér til hamingju.“

Úps!

Blaðamaður leiðrétti sig og spurði hvort Max myndi óska Hamilton til hamingju ef hann ynni á sunnudaginn. Svaraði hann þá: „Ef hann vinnur á sanngjarnan hátt, þá mun ég pottþétt gera það.“

Mikið gengið á

Það er óhætt að segja að engin lognmolla hafi verið í kringum þá karla, Max og Lewis, á þessu ári. Alla vega ekki í keppni. Ótal atvik, stór og smá hafa átt sér stað; kless, meira kless, brot á reglum og alls konar sem tína má til.

Skrifar blaðamaður ESPN að Max og Red Bull liðinu hafi gramist mjög að „Hamilton og Mercedes fögnuðu sigri á meðan hann var sjálfur á spítala til skoðunar“ eftir skakkaföllin í Breska kappakstrinum.

Já, þetta sárnaði Max og er greinilega ekki búinn að gleyma því að hann mátti dúsa á sjúkrastofu, meðan hinir höfðu gaman.

Efi og ásakanir

Eins og frægt er orðið gaf Max í skyn að bíll Mercedes væri ekki löglegur vegna þess hve mikið afturvængur bílsins opnaðist. Í framhaldi af því gerði FIA úttekt á bílnum sem reyndist, þegar allt kom til alls, uppfylla reglurnar.

Þá lét Max eftirfarandi orð falla: „Því miður getum við ekki látið skoða bílinn aftur né heldur getum við vitað hvernig hann var í fyrri keppnum á tímabilinu. En það var greinilega eitthvað undarlegt í gangi. En svona er þetta bara,“ sagði Max.

„Fáið þið ókeypis ís?“

En til að ljúka þessu á léttari nótum þá fengu þeir Max og Lewis skemmtilega spurningu á blaðamannafundi sem haldinn var í Abu Dhabi í dag. Sú spurning kom frá ungum aðdáanda, Emily að nafni. Hún spurði: „Hvernig er að vera frægur? Fáið þið ókeypis ís út af því að þið eruð frægir?“

Hamilton: „Það er frekar furðulegt að fólk þekki mann þegar maður er á veitingastað eða að bara úti að ganga. En þegar allt kemur til alls þá er maður enn sama mannneskjan. Maður fer svo heim til sín og gerir það sem maður gerir venjulega. Hittir fjölskylduna og allt er eins og vanalega. Pabbi og mamma horfa á sína sjónvarpsþætti og allt eins og það á að vera,“ sagði Hamilton.

„En þetta með ísinn, nei, ég fæ ekki ókeypis ís. Í ísbúðinni í hverfinu hafa þeir ekki gefið mér ís. Ég ætti kannski að stinga upp á því við þá!“

Max svaraði Emily á þá leið að mikilvægast af öllu væri að halda í vini sína, og leyfa frægðinni ekki að trufla vináttubönd. „Ég reyni líka að vera sem mest með fjölskyldunni og jú, auðvitað kemur það fyrir að einhver þekki mann. Þá er mikilvægt að vera maður sjálfur og það held ég að sé best. Hvað ókeypis ís varðar þá fæ ég reyndar ókeypis ís því sð hálfbróðir pabba míns rekur ísbúð. Þannig að ef mig langar í ókeypis ís þá get ég alltaf komið við hjá honum,“ sagði Max Verstappen að lokum, og svei mér ef ekki var bros á andliti karls, sem gríman faldi að mestu.

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.