Mustang fær dekkra yfirbragð með Stealth Edition 2022

Einnig er von á „GT Performance Package“ sem gerir California Special útgáfu bílsins m.a. skemmtilegri í akstri

Ford auðveldar unnendum Mustang að sérsníða bílinn beint frá verksmiðjunni með því að setja á markað útlitspakka sem heitir Stealth Edition, fyrir árið 2022.

Þá fæst „GT Performance pakkinn“ fyrir California Special útgáfu Mustang í fyrsta skipti.

2022 Ford Mustang Stealth Edition

Stealth Edition pakkinn (sýndur á myndinni að ofan og nokkrum til viðbótar fyrir neðan) er í boði fyrir 310 hestafla EcoBoost Premium gerðina, sem kemur þá á svartmáluðum 19 tommu felgum, með svörtum merkjum, spegilhúsum og vindskeið á skottlokinu.

Ford bætti einnig hlífum yfir afturljósin; þær eru sömu einingar og búnar voru til fyrir „Mustang Ice White“ útgáfuna sem kynnt var fyrr á árinu 2021. Innréttingin er öll dekkri og yfirbragðið allt dekkra en þröskuldarnir eru aftur á móti upplýstir.

Kaupendur Stealth Edition geta valið á milli fjögurra lita á bílinn en þeir bera nöfnin: Atlasblár, Kolefnisgrár, Dark Matter og Shadow Black.

Það eru engar vélrænar breytingar, þannig að hver Stealth-útgáfa verður með 2,3 lítra túrbó, fjögurra strokka vél.

2022 Ford Mustang California Special með GT Performance Package

Ford bætti nýlega „Performance Package“ við California Special eins og áður segir, en áður fékkst sá pakki aðeins fyrir staðalgerð V8-knúna GT bílsins (sbr. myndirnar hér að neðan).

Þar fær bíllinn sex stimpla Brembo bremsuklossa að framan, sportlegri uppsetningu undirvagns með öflugri fjöðrun að framan og stærri afturhjól. Svo má ekki gleyma að öflugari jafnvægisstöng að aftan og Torsen mismunadrif eru á meðal breytinga sem hafa áhrif á aksturseiginleika bílsins. Það er fleira í pakkanum og má þar næst nefna 19 tommu felgur og Pirelli sumardekk. Rendurnar á hliðunum haldast á sínum stað.

Fyrst um sinn aðeins í Bandaríkjunum

Ford sölumenn víðsvegar um Bandaríkin byrja að taka við pöntunum á Stealth Edition og GT Performance pakkanum fyrir California Special síðar á árinu 2021 og áætlað er að afhendingar hefjist á fyrsta ársfjórðungi 2022. Verð hefur ekki verið gefið upp.

(frétt á Autoblog)