Er Škoda að setja ný viðmið í framleiðslu rafbíla?

Jóhannes Reykdal og Pétur R. Pétursson

Við fengum það ánægjulega tækifæri að prófa fyrsta Škoda Elroq bílinn sem fór á götuna á Íslandi, nýkominn til Heklu á Laugaveginum. Ef þetta er það sem Škoda stefnir á inn í framtíðina er framhaldið spennandi, Elroq leit vel út í bæklingnum – og stóð svo sannarlega undir væntingum í akstri.

Gullfalleg hönnun á nýjum Elroq frá Škoda.

Þrjár spennandi útfærslur

Škoda Elroq er fáanlegur í þremur útfærslum: Selection, Style og Sportline kemur síðan í sumar. Hver þeirra býður upp á einstaka eiginleika sem höfða til ólíkra notenda.

Selection er hagnýtur og hagkvæmur, Style býður upp á glæsileika og þægindi á meðan Sportline leggur áherslu á sportlegt útlit og kraftmikla upplifun.

Reynsluakstursbíllinn var með rafdrifinn afturhlera.

Hvernig er að aka nýja Elroq

Škoda Elroq er virkilega lipur og þægilegur í akstri. Stýrið er nokkuð nákvæmt í ætt við bíla frá VW samsteypunni. Fjöðrunin virkar meira eins og í hefðbundnum bíl með brunavél en þeim rafbílum sem við höfum prófað.

Það sem kom Jóhannesi Reykdal mest á óvart var hve fjöðrunin er góð í þessum bíl. (sjá myndband).

Framleiðendur virðast vera að færast nær því að bæta aksturseiginleika rafbíla með stillingu fjöðrunar og spila á þyngdina sem liggur neðst í svona bílum.

Elroq er afar hljóðlátur, enda ekki mikið mótorhljóð í rafbílum yfirleitt, vel einangraður og lítið umhverfisshljóð sem oftar en ekki fer í taugarnar á mörgum ökumönnum.

Afturhjóladrif með öflugri spólvörn

Einn helsti styrkleiki Elroq er afturhjóladrifið, sem gefur bílnum sportlegri aksturseiginleika. Spólvörnin kom skemmtilega á óvart, sérstaklega þegar ekið var á blautum götum – stöðugleikinn var til fyrirmyndar og gripið í beygjum áberandi betra en í mörgum öðrum sambærilegum rafmagnsbílum.

Öflug rafhlaða og framúrskarandi drægni

Með 77 kWh rafhlöðu fær Elroq drægni upp á 540–580 km samkvæmt WLTP mælingum. Þetta gerir bílinn að frábærum valkosti fyrir íslenskar aðstæður, hvort sem þú ert að keyra um höfuðborgarsvæðið eða leggja í lengri ferðir út á land.

Rafhlaðan hleðst hratt og auðveldlega, sem gerir daglegt líf einfaldara og fyrirhafnarminna.

Varmadæla er í öllum gerðum. Þú ert um 28 mínútur að hlaða bílinn í hraðhleðslu frá 10-80%.

Þrjár gerðir í boði, Selection, Style og Sportline.

Afl sem skilar sér auðveldlega

Með 286 hestöflum stendur Elroq aðeins uppúr í þessum stærðarflokki. Í reynsluakstrinum var greinilegt að þessi kraftur gerir bílinn kvikan í akstri, með frábæru viðbragði bæði í borgarakstri og á hraðbraut.

Hröðunin var slétt og kraftmikil – sem er eiginleiki sem mun án efa heilla akstursunnendur. Sætin halda vel utan um búkinn og maður sveiflast ekki til og frá í beygjum.

Fótapláss er mjög gott frammí, en ekki síður aftur í þar sem fór virkilega vel um okkur prófunarmenn – sem báðir eru frekar hávaxnir. Innréttingin í reynsluaksturs bílnum vekur eftirtekt fyrir að vera smart og hagnýt en leðuráferð er á slitflötum og sportlegt áklæði á milli. Allur frágangur 100% eins og Škoda er von og vísa.

Höfuðpláss aftur í er ótrúlega gott miðað við stærðarflokk bíls.

Simply clever

Þær lausnir sem Škoda hefur kosið að kalla Simply Clever eru einstakar. Til dæmis er skottið í bílnum með farmfestingum sem þú smellir á teppið með „frönskum” rennilás.

Þannig getur þú skorðað ýmislegt smádót þannig að það renni ekki um allt farangursrýmið.

Regnhlífin er á sínum stað í bílstjórahurð og snjóskafa með málstiku er í skottlokinu. Málstikan er til að mæla dýptina á munstri dekkjanna. Svo er farangursgeymslan á tveimur hæðum líka.

Sérlega vel búinn

Hægt er að panta bílinn í alls níu litum hjá Heklu. Selection útgáfan er mjög vel búinn bíll. Til að mynda er í honum hljóðeinangrandi gler, sem skýrir hversu lítið hljóð berst inn í bílinn. Hljómtæki með átta hátölurum, akreinavari, skynjarar að framan og aftan og umferðaskiltalesari.

Í Style bílnum eru þessi flottu sæti, klædd taui í miðju og leðri á slitflötum. Um er að ræða Lodge innréttingu.

Í Style gerð, umfram Selection bílinn erum við að tala um 20 tommu álfelgur, 360° myndavél, háuljósaaðstoð og nudd í ökumannsssæti.

Í toppgerðinni, Sportline eru síðan 20 tommu álfelgur, Sportline sæti, sportstilling í akstursvali og bílastæðaaðstoð. Bíllinn sem við prófuðum var af Style gerð, First edition með Lodge innréttingu og svokölluðum vetrarpakka – virkilega flottur bíll.