Er kínverskt vont?

Ég hef alltaf púkalega mikla ánægju af því þegar fólk rekur trýnið upp í loft, hnussar og segir: „Iss, þetta er nú bara Kínverji,“ um bíla á borð við Polestar 2 eða MG. Eins og það sé eitthvað slæmt.

„Ég kæri mig ekkert um svona Kínadót. Þess vegna á ég Teslu frá Ammmríku,“ segja sumir hróðugir. Í alvöru, þetta heyrir maður og les. En bíðum nú hæg.

Fram til ársins 2021 var stórt hlutfall íhluta Tesla, frá… Kína. Nú hefur hlutfallið lækkað en eftir sem áður eru ofsalega margir íhlutir í Tesla og fleiri ameríska bíla framleiddir í Kína. Er eitthvað óeðlilegt við að fjölmennasta land í heimi búi yfir þekkingu, mannauði og fleira? Auðvitað ekki.

Ég nefndi MG hér að ofan. Skoðum MG aðeins:

MG Motor UK Limited er enskur bílaframleiðandi. Höfuðstöðvar fyrirtækisins eru í London og er MG Motor dótturfélag SAIC Motor UK sem er að hluta til í eigu kínverska ríkisfyrirtækisins SAIC Motor.

Polestar var líka nefnt í sömu setningu:

„??Polestar er sænskt bílamerki stofnað árið 1996 af samstarfsaðila Volvo Cars Flash/Polestar Racing og var keypt árið 2015 af Volvo, en Volvo var keypt árið 2010 af kínverska fyrirtækinu Geely í Hangzhou í Zhejiang. Polestar er með höfuðstöðvar í Gautaborg í Svíþjóð og fer framleiðsla bíla þeirra fram í Kína.“ Svo segir í grein nokkurri á okkar ágæta vef og hana má lesa hér.

Hafa þeir einhverja reynslu, þeir í Kína?

Hversu marga bíla ætli Kínverjar framleiði á ári. Tjah, til að einfalda þetta aðeins þá skulum við skoða fjölda framleiddra bíla á mánuði því tölurnar eru annars með svo mörgum núllum fyrir aftan. 310.000 vörubílar eru framleiddir að meðaltali í hverjum mánuði og 1.770.000 fólksbílar. 32% bílaframleiðslu alls heimsins má rekja beint til Kína og ekki get ég ímyndað mér hvert hlutfallið er þegar kemur að framleiðslu íhluta almennt, svo ekki sé minnst á rafhlöður í rafbíla.

Ef þeir kunna þetta ekki þarna í Kína, hver kann þetta þá?

Nýlega skrifaði einhver eigandi rafbíls af gerðinni Tesla eftirfarandi á spjallþráð:

Kínahlutir í US Model 3???

„Ég var að hreinsa innan úr felgunum á Model 3 þegar ég kom auga á merkinguna Made in China á framanverðum demparanum, beint undir QR kóðanum. Veit eitthvert ykkar hversu margir hlutir eða hvaða hlutar Model 3 eru búnir til í Kína?“

Skömmu síðar breytti viðkomandi fyrirsögninni en eftir sem áður endurspeglast að vissu leyti hræðsla vestrænna þjóða við það sem kínverskt er. Það kemur kannski ekki á óvart í Bandaríkjum Norður-Ameríku þar sem nokkuð er alið á því að Kína sé grýlan og samkeppnisaðilinn ógurlegi á ýmsum sviðum.

Nýlegt dæmi eru orð sem Bandaríkjaforseti lét falla: „Sko, þar til nú, hefur Kína verið fremst í flokki í þessu kapphlaupi [rafbílaframleiðslu]. En nú breytist það.“ Um þetta kapphlaup var skrifuð grein sem lesa má hér.

Til að öllu sé til haga haldið þá er listi sem mörgum þykir gott að geta litið á áður en bíll er keyptur í Bandaríkjunum. Listi yfir „amerískustu“ amerísku bílana og listi yfir þá sem eru minnst amerískir af amerískum bílum.

Beint frá býli og minna kolefnisspor

Auðvitað er frábært að leggja áherslu á að efla innviðina og styrkja með því að hvetja til þess að notað sé það sem fáanlegt er á svæðinu. Þar með þarf ekki að flytja allt heimshorna á milli og menga ofsalega mikið. Það er gott.

Hins vegar er óhjákvæmilegt í mörgum tilvikum að nota eitt og annað sem framleitt er lengst í burtu; sérstaklega þegar maður býr á eyju o.s.frv. En er ekki óþarfi að mála skrattann á vegginn, rétt eins og verið sé að versla við undirheima þegar tenging við Kína er í uppskriftinni?

Sérstaklega þegar við hér í fámenninu á Íslandi erum farin að fussa þegar eitthvað er með kínverska tengingu.

Ef flugeldur springur of snemma eftir að kveikt er í honum á gamlárskvöld, þá er viðkvæðið oftar en ekki: „Djö*** kínverska drasl!“ Já, eru flugeldar framleiddir annars staðar en í Kína? Ég veit ekki. Ekki heyrir maður sagt eftir vel heppnaða flugeldasýningu: „Já, þeir eru nú alveg með þetta, Kínverjarnir!“

Jæja lesendur góðir, þetta var nú meiri pistillinn! Vonandi verður hann til þess að við gætum orða okkar og ígrundum áður en við bölsótumst yfir því sem kínverskt er. Kína er nefnilega nær en margan grunar. Hvaðan er til dæmis lyklaborðið þitt?

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.