Álitlegur sjö sæta Dacia Jogger

• Sjö sæta Dacia Jogger sameinar hagkvæmni fjölnotabíls og áhrif frá jeppahönnun, og tvinnbíll verður í boði í fyrsta skipti frá Dacia

Dacia frumsýnir í Munchen nýjan Jogger sjö sæta fjölskyldubíl, sem verður fyrsta blendingsútgáfan frá þeim.

Að sögn Dacia sameinar Jogger hagkvæmni fólksbíls, pláss fjölnotabíls og eðli jeppa. Þar sem verð er sagt verða frá um það bil 15.000 evrum, eða 2,26 milljónum króna á gengi dagsins í dag, þegar bíllinn kemur í nóvember á þessu ári, lítur út fyrir að Jogger verði ódýrasti sjö sæta bíllinn á markaðnum.

Þetta er mjög álitlegur bíll, en óvíst hvort eða hvenær hann kemur á markað hér á landi.

Við höfðum samband við BL, söluaðila Dacia á Íslandi, og þar á bæ fengum við þau svör að þeim fyndist bíllinn álitlegur, en engin ákvörðun lægi fyrir um hvort hann yrði til sölu hér á landi.

Góð veghæð og „jeppalegt“ útlit

Við höfum svo sem fjallað um Jogger hér á vefnum okkar, en þar sem við áttum þess ekki kost að vera á sýningunni í Munchen skulum við skoða þennan nýja bíl nánar með augum bílvefsins Auto Express. En fyrst vísum við í lýsingu framleiðandans sjálfs sem segir eftirfarandi um Jogger:

Dacia Jogger: Lengd skutbíls, stærð fjölnotabíls og útlit sportjeppa

Jogger er rúmlega 4,5 metrar á lengd sem gerir bílinn þann lengsta frá Dacia. Veghæðin er 200 mm frá jörðu. Jogger er, eins og allar væntanlegar Dacia gerðir, byggður á CMF-B grunni vörumerkisins.

Dacia Jogger: innrétting og hagkvæmni

„2,9 metra hjólhafið gerir ráð fyrir allt að sjö sætum, þó að Jogger verði einnig fáanlegur í fimm sæta útgáfu; við [blaðamaður Auto Express] könnuðum hversu mikið pláss væri í þriðju röð sjö sæta útgáfunnar og getum greint frá því að vel mun fara um fullorðna í öftustu sætunum,“ segir í grein Auto Express.

Rýmið í miðröðinni er svipað og þó ekki sé hægt að renna tvískiptum bekknum (60:40) til, þá er hægt að velta sætinu fram og bæta aðgengi að aftasta sætinu. Þetta er líka hagnýtur bíll með mikla lofthæð; 40 mm hækkun er á milli lofts fremri og aftari hluta í farþegarýminu.

Önnur atriði sem auka notagildi eru t.d. aðfellanleg borð aftan á framsætum og innbyggðir þakbogar sem með fáeinum handtökum má breyta í þverboga.

Farangursrými er 213 lítrar með öll sjö sætin á sínum stað og fer upp í 712 lítra í fimm sæta stillingu með hámarks farmrými 1.819 lítra í boði með því að fjarlægja öftustu sætin (auðvelt mál, skrifaði blaðamaður Auto Express, þar sem hver stóll í þriðju röð vegur aðeins 10 kg), og leggja svo aðra röð niður.

Jogger býður upp á allt að 24 lítra geymslupláss hérr og þar í bílnum; í hanskahólfi, hólfum í hurðum (hver er með pláss fyrir eins lítra flösku) og lokuðu hólfi í miðjustokki, auk sex glasahaldara.

Dacia Jogger: vélar og aflrásir

1.0 lítra þriggja strokka túrbóvél Dacia verður eina vélin sem býðst sem til að byrja með, annaðhvort sem TCe 110 bensínvél eða TCe 100 Bi-Fuel.

Bensínvélin er 108 hestöfl og togið 200 Nm. Sex gíra beinskipting er í bílnum.

Bi-Fuel eldsneytisútgáfan er aðeins aflminni eða 99 hö og togið 170 Nm .

Stærri fréttir eru að Jogger verður fyrsti bíll Dacia með tengitvinnbúnaði árið 2023. Sá verður búinn 1,6 lítra bensínvél, tvöföldum rafmótor og 1,2kWh rafhlöðuuppsetningu. Þetta er sama vél og í Clio frá systurmerkinu Renault.

Dacia Jogger: útfærslur og hönnun

Frá upphafi verður Jogger fáanlegur í þremur útfærslum. Grunngerðin nefnist Essential, sú næsta Comfort og að lokum Extreme sem mun koma í takmörkuðu upplagi. Í Extreme útfærslunni eru meiri torfæruáherslur; svört klæðning utan um hjólboga og stuðara, sem og hlífðarplötur að framan og aftan. Jú, og 16 tommu svartar álfelgur eru líka hluti af Extreme útfærslunni.

Það er samsvörun við útlit Duster að framan, en sumt af hönnun Jogger þjónar einnig hagnýtum tilgangi. Til dæmis hámarka lóðrétt afturljósin breidd opsins á farmrýminu til að auðvelda að hleðslu stórra hluta.

Öryggistæknin er meiri en nokkru sinni fyrr, með sjálfvirkri nauðhemlun og sex loftpúðum sem staðalbúnað, en blindhornsviðvörun og bílastæðaaðstoð verða einnig fáanleg.

Dacia Jogger: afþreyingarkerfi og tækni

Jogger mun koma á markað með þremur mismunandi margmiðlunarkerfum eftir búnaðarstigi. Í fyrsta lagi er Media Control, sem er byggt í kringum snjallsímaforrit, sem varpar upplýsingum yfir á skjá á mælaborðinu. Þetta er einfalt viðmót sem stýrir leiðsögukerfi símans, miðlum og síma.

Næst er Media Display kerfið, sem bætir við átta tommu snertiskjá með Android Auto og Apple CarPlay, auk fjögurra hátalara hljómtækis.

Að lokum bætir Media Nav við innbyggðu leiðsögukerfi, auk þráðlausrar snjallsímatengingar, sex hátalara hljómtækis og tveggja USB tengja.

Búist er við fyrstu afhendingu á bílum í byrjun árs 2022, en Jogger Hybrid mun bætast við árið 2023.

Núna verðum við bara að sjá hvort þessi hagkvæmi fjölnotabíll muni koma á markað hér á landi.

(byggt á frétt á vef Auto Express – myndir frá Dacia og Auto Express)