Rafmagns Nissan Micra kemur 2025

Rafmagns Nissan Micra kemur 2025

Núverandi Nissan Micra verður skipt út fyrir nýja rafdrifna gerð sem deilir grunni með næsta Renault 5

Nissan hefur ákveðið að halda sig á markaði minni bíla í Evrópu með því að staðfesta að það ætli að skipta út núverandi Micra, sem selst hægt þessa dagana, fyrir nýja rafknúna gerð, sem mun tengjast nýjum Renault 5 en hann á að koma á markað árið 2024.

„Þessi alveg nýja gerð verður hönnuð af Nissan og framleidd af Renault með því að nota nýja sameiginlega grunninn,“ sagði Ashwani Gupta, rekstrarstjóri Nissan. Nissan kynnti einnig myndir af nýja bílnum, sem er með kringlóttara hönnunarútlit samanborið við kantaðan Renault 5 sem hann mun deila grunni með.

Þessi nýi arftaki Micra verður byggður á Renault-Nissan-Mitsubishi Alliance CMF-BEV grunninum.

„Þetta er frábært dæmi um „snjalla aðferð til aðgreiningar“ innan bandalagsins. Ég er viss um að þessi nýja gerð mun taka við af hinum þekkta Micra okkar og mun veita viðskiptavinum okkar í Evrópu frekari spennu,“ bætti Gupta við.

Keppinautur japanska vörumerkisins fyrir Ford Fiesta og Vauxhall Corsa hefur átt í erfiðleikum með sölu á nýjustu fimmtu kynslóð sinni, þar sem fjöldinn um alla Evrópu féll úr meira en 86.000 árið 2017 í innan við 40.000 í Covid-árferðinu árið 2020.

Kostnaður við þróun lítilla bíla með brunahreyflum vegna væntanlegra og fyrirhugaðra Euro 7 losunarreglna virðist gera þeim erfiðara en nokkru sinni fyrr að græða á slíkum bílum, þar sem Thomas Schafer, yfirmaður Skoda, benti nýlega á að verð á einum af helstu keppinautum Micra, Fabia, gæti hækkað um allt að 875.000 kr ef ströngustu tillögur EU7 verða samþykktar.

Guillaume Cartier, yfirmaður Nissan í Evrópu, ræddi við Auto Express í fyrra og gaf í skyn að fyrirtækið gæti komið fram með arftaka Micra og viðurkenndi að Nissan væri að kanna hvaða úrræði bandalagsins gætu gert það kleift að smíða slíkan bíl:

„Kjarnastarfsemin í dag og á morgun er crossover – Juke, Qashaqi, X-Trail, Ariya og nýi bíllinn sem við höfum talað um [nýr crossover rafbíll í stað Leaf],“ sagði hann. „Þetta eru nú þegar fimm bílar.

Síðan verðum við, fyrir hvern bíl, að ganga úr skugga um að við höfum dýptina – nægjanlegar aflrásir til að passa við rúmmálið sem við höfum. Við viljum ganga úr skugga um að þessi kjarni, miðað við rúmmál á hverja gerð, sé að aukast.

Þá notum við bandalagið (samstarfið Nissan, Mitsubishi og Renault). Við munum vinna með bandalaginu fyrir heildarlínuna okkar af léttum atvinnubílum. En eitt umræðuefni er enn opið og þetta er grunngerð framboðsins. Lykilatriðið er að segja: „Hvernig getum við boðið eitthvað, hugsanlega með bandalaginu, sem mun lokka fólk til að ganga inn í Nissan vörumerkið og njóta þess síðan að fara úr gerð í næstu gerð?“

Það er það sem við erum að íhuga. Það er einmitt spurningin sem við verðum að leysa.”

CMF-BEV grunnurinn, sem þegar er eyrnamerktur arftaka rafmagnaðs Renault Zoe, Renault 5 með hönnun í gömlum anda, hefur gert Nissan kleift að svara þessari spurningu. Bandalagið heldur því fram að heildarkostnaður grunnsins við framleiðslu sé 30 prósentum lægri en rafmagnsútgáfan af CMF-B sem er grunnur Zoe, sem þýðir að litlir bílar byggðir á þessari tækni geta komist nálægt verðjöfnuði við minni bíla með brunahreyfli. Grunnurinn mun leyfa allt að 400 km á fullri hleðslu.

Kynning á rafknúinni Micra mun vera nálægt fyrirhuguðum kynningardegi á EU7-reglunum árið 2025 og Cartier staðfesti að Nissan hefur engin áform um að fjárfesta í vélum sínum og farartækjum til að gera þær í samræmi við nýju reglurnar.

„Á skipulagðan hátt erum við að veðja á rafvæðingu,“ sagði hann, „að því marki að við erum ekki að fjárfesta í Euro 7.“

(frétt á Auto Express – Myndir Nissan)