1971 VW Porsche 914

1971 VW Porsche 914/4 1.7

VW og Porsche hafa í gegnum tíðina átt í samstarfi. Seint á sjöunda áratugnum kom upp sú staða að bæði VW og Porsche vantaði nýjar gerðir sportbíls. Þá hafði Volkswagen framleitt Karmann Ghia um skeið og Porsche var að skoða gerðir sem gætu bæst við fyrstu útgáfu bíls þeirra, Porsche 912.

Volkswagen átti, eins og áður kom fram, í samstarfi við Porsche og þá helst í þróunarmálum varðandi bílaframleiðslu þeirra.

Það samstarf hafði verið við lýði allt frá stofnun Porsche en sá sem stóð þar í brúnni var á þeim tíma Ferdinand Piëch. Til að ljúka samningnum við Porsche þurfti einn bíl til. Bíllinn sá er Porsche 914.

Úr varð að bæði nöfnin voru notuð

En bíllinn olli deilum milli VW og Porsche, munnlegt samkomulag Heinrich Nordoff við Porsche um samstarf í framleiðslu féll um sjálft sig er hann lést þann 12. apríl 1968.

Nýr forstjóri VW, Kurt Lotz átti hins vegar enga tengingu inn í Porsche ættarveldið og þessu munnlega samkomulagi bílaframleiðendanna var rift.

Kurt áleit VW eiga allan rétt á framleiðslu bílsins undir merkjum VW en Porsche-menn töldu að það gæti ruglað markaðinn vesthanhafs að bjóða bíla byggða á sama undirvagni, og með sama útlit en mismunandi vélum. Þrátt fyrir það átti VW bíllinn að vera með 4 strokka vél Porsche-inn með 6 strokka vél.

En bíllinn fór á markað, mikið dýrari en áætlað var vegna deilna um framleiðslutilhögun og það að menn vildu ekki samnýta verkfærakisturnar til að ná fram lægra framleiðsluverði.

VW Porsche kom á markað árið 1969 og var framleiddur til ársins 1976. Þetta var huggulegur, 2ja sæta roadster sem aðeins var hægt að fá með targa toppi. Targa er skrásett vörumerki Porsche og kom fyrst fram með Porsche 911 Targa sem kom árið 1966. Þetta er hálfur harðtoppur/blæja.

Þessi er til sölu núna

Volkswagen Porsche 914/4, 1.7 frá 1971 og hefur verið tekinn í ræmur. Um er að ræða boddý, vél og innréttingu alveg eftir forskrift Porsche. Endurgerð þessa bíls hófst um 2018 og lauk í maí 2020.

Bílnum fylgir uppruna- og skráningarvottorð og eintak þetta er skráð á Ítalíu.

Þetta eintak er með svartri leðurinnréttingu og 1679 cc vélin skilar um 80 hestöflum. Beinskiptur með fimm gíra kassa. Litir að innan sem utan eru þeir sömu og þegar bíllinn kom nýr úr verksmiðju.

Við erum hér að tala um mjög pottþétt eintak, áreiðanlegan bíl sem allur hefur verið yfirfarinn og þá sérstaklega vélin – segir í sölulýsingu bílsins. Upprunalegar Lemmerz felgur eru undir bílnum. Bíllinn er án galla af nokkru tagi þar með talið keyrir hann ákaflega vel, gírskipting er vel stillt og virkar fullkomlega, hemlakerfið einnig og síðast en ekki síst rafkerfið.