VW hættir að taka við pöntunum vegna stríðsins

VW hættir að taka við pöntunum

VW mun hætta að taka við pöntunum á sumum tengitvinnbílum vegna skorts á tölvukubbum og annarra vandræða í birgðakeðjunni eftir innrás Rússa í Úkraínu.

Það er sífellt að koma betur í ljós hvernig innrás Rússa í Úkraínu hefur áhrif á bílaiðnaðinn. Samkvæmt frétt frá Reuters mun Volkswagen hætta að taka við pöntunum á fjölmörgum tengitvinnbílum vegna skorts á örflögum og vandræða í birgðakeðjunni í tengslum við innrásina. VW hættir meðal annars að taka við pöntunum á Tiguan eHybrid, sem er á myndinni hér að ofan.

Afhending gæti dregist út árið

Pantanir á tengitvinnútgáfum af VW Golf, Tiguan, Passat, Arteon og Touareg gerðum verða stöðvaðar þar til annað verður tilkynnt og afhending á þegar pöntuðum bílum gæti dregist út þetta ár, sagði VW á þriðjudag.

Þessu er ætlað að koma í veg fyrir að afhendingartími lengist enn frekar, sagði talsmaður VW við Automobilwoche, systurútgáfu Automotive News Europe.

Afhendingartími sumra gerða er nú þegar átta til tíu mánuðir, sagði Automobilwoche og vitnaði í innherja fyrirtækisins.

VW er með þessu samtaka Audi um að loka fyrir frekari pantanir vegna framleiðslutruflana.

Fréttin kemur í kjölfar ákvörðunar VW um að stöðva framleiðslu í Rússlandi og stöðva tímabundið framleiðslu í nokkrum verksmiðjum í Þýskalandi undanfarnar tvær vikur.

Framleiðsla stöðvuð tímabundið

Aðalverksmiðja bílaframleiðandans í Wolfsburg verður aðgerðalaus frá 14. mars til 18. mars, að sögn VW. Verksmiðjan í Zwickau, sem framleiðir rafbíla, mun einnig stöðva framleiðslu til 18. mars.

Verksmiðjur VW í Hannover og Dresden sem og tvær verksmiðjur í Póllandi verða einnig fyrir áhrifum, sagði fyrirtækið.

Úkraína og Rússland eru minniháttar sölumarkaðir en afhendingarflöskuhálsar fyrir íhluti eins og vírasamstæður sem framleiddar eru í Úkraínu, auk hækkandi hráefnisverðs, hamla framleiðslu bílaframleiðenda um alla álfuna.

(Automotive News Europe)