Ótrúlega rennilegur

Nú styttist í útgáfu kvikmyndar um ofurhetjuna The Flash. Kvikmynda- og teiknimyndasögu heimurinn bíður spenntur og það af góðri ástæðu.

Þar mun Michael Keaton endurtaka hlutverk sitt sem Bruce Wayne og Batman. Sögusagnir og myndir af tökum hafa lekið á netið og þar má sjá bíl Waynes og er það ansi glæsilegur Mercedes Maybach blæjubíll, sem reyndar sást fyrst fyrir fjórum árum.

Maybach 6 Cabriolet

Bíllinn er hugmyndabíll af gerðinni Mercedes Maybach 6 Cabriolet sem er blæjuútgáfa sem birist árið 2016. Þessi bíll er algjörlega viðeigandi fyrir hinn uppskáldaða milljarðamæring Bruce Wayne.

Bíllinn er langur, glæsilegur og ber hið tigna Maybach merki Mercedes. Hann gæti eflaust líka nýst sem Batmobile því ekki vantar upp á aflið en Mercedes sagði hugmyndabílinn búa yfir fjórum mótorum sem saman gæfu um 750 hestöfl.

Reyndar er nær öruggt að bíllinn sem notaður er í bíómyndinni er ekki svo kraftmikill enda þarf hann bara að líta vel út og komast á frá A til B í tökum.

Bíllinn virðist vera nánast óbreyttur frá sýningarbílnum sem kom árið 2016. Hardtoppurinn var reyndar rauður en blæjubíllinn er dimmblár og hæfir sennilega milljarðamæringnum betur.