Alvöru prófun á Ford Bronco Sport Badlands í Ameríku

Alvöru prófun á Ford Bronco Sport Badlands í Ameríku

• Besta útgáfan, einnig á hefðbundnu slitlagi
• Samkeppnishæf verðlagning og búnaður gerir bílinn virkilega aðlaðandi

Nýr Ford Bronco Sport þykir spennandi bíll og það bíða margir hérlendis eftir bílnum og að heyra meira af kostum hans og göllum. Autoblog-vefurinn tók Ford Bronco Sport Badlands útgáfuna í reynsluakstur og hér á eftir fylgir umsögn þeirra um bílinn í lauslegri þýðingu:

Í framboði Ford Bronco Sport í árgerð 2021 er Badlands markaðssettur sem sérhæfður í torfæruakstri. Til að styðja við þetta er bíllinn með fjölda eiginleika fyrir slíkan akstur. En það kom líka í ljós að sumir af þessum eiginleikum gera bílinn að skemmtilegustu útgáfunni í hefðbundnum borgarakstri líka. Bætt hefur verið við nægum þægindaaðgerðum og samkeppnishæfri verðlagningu, og þú hefur bestu útgáfuna af Bronco Sport og alvarlegan keppinaut meðal annarra svona bíla.

Vélbúnaðurinn aðgreinir

Það eru vélrænu uppfærslurnar sem aðgreina Badlands frá öðrum Bronco Sport. Undir húddinu er turbó 2,0 lítra fjögurra strokka vél sem er 250 hestöfl og togið er 376 Nm. Þetta er aukning um 69 hestöfl og 118 Nm umfram aðrar Bronco Sport gerðir. Vélin er tengd við átta gíra sjálfskiptingu til allra fjögurra hjóla, en er með tvöfalda kúplingu á mismunadrifi að aftan. Og auk þess að hægt er að beita toginu vel og hægt er að læsa mismunadrifinu að aftan og miðjumismunadrifinu til að auka gripið. Gírskiptingin og mismunadrifið að aftan fá líka sína eigin olíukæla.

Badlands er með 28,5 tommu hjólbarða fyrir allt yfirborð sem staðalbúnað, með 29 tommu hjólbarða sem valkost.

Badlands fær einnig fjöðrunarbúnað fyrir torfæruakstur, hlífðarplötur á undirvagni, einstökum „Mud“ og „Rock Crawl“ drifstillingum (GOAT stillingum), myndavél að framan, sem og akstursstjórnunarkerfi Ford sem kallast „Trail Control“.

Góður jafnt á vegi og vegleysum

Við hjá Autoblog höfum áður eytt nokkrum tíma í Badlands utan vega, þar sem hann stóð sig frábærlega. Að þessu sinni gátum við prófað bílinn í raunverulegu náttúrulegu umhverfi sínu, borgargötum og hraðbrautum, og þar stendur hann sig vel líka. Vélin er frábær. Ekki aðeins skilar hún öllu aflinu, heldur gerir hún það á öllu orkusviðinu og gerir það fljótt í næstum öllum aðstæðum. Svo er það þessi ágæti afturöxull.

Þó hann sé ekki sá sami og í Ford Focus RS, sem er góður, þá virkar hann á svipaðan hátt: á hvorri hlið mismunadrifsins er kúpling sem getur virkjað eða aftengt öxul til að senda afl í hjólið þar sem mest er þörf (tog-vektor).

Og í sportstillingu er aðlögun á togi stillt og enn meira af togi vélarinnar er sent aftur til hjólanna. Þetta breytir verulega eðli Bronco Sport, gerir hann liprari og sneggri í erfiðum aðstæðum.

Í sjálfgefinni stillingu, og venjulegum 1,5 lítra búnum Bronco Sport sem er með hefðbundnara fjórhjóladrifskerfi, sem ekki er með togstillingu, er meiri tilhneiging til undirstýringar. Okkur þætti gaman að sjá Ford gera þetta fjórhjóladrifskerfi tiltækt í einhverju eins og Escape ST.

Þessar breytingar (Badlands) bæta ekkert sérstaklega upplifunina á venjulegum vegum, en þær draga þó ekki úr henni heldur. Fjöðrunin sem stillt er fyrir torfæruakstur getur verið svolítið þétt og ójöfn á holóttu og grófu malbiki, eitthvað sem við tókum ekki eftir í Badlands Bronco Sport. Hann fer þó létt með stórar holur. Það er vægur vottur af veltihreyfingum á bílnum, meðal annars vegna þess hve hár bíllinn er frá götunni.

Hann er samt alveg með gott viðbragð og meðfærilegur. Hjólbarðarnir, sem ætlaðir eru fyrir grófara landslag, höfðu einnig mjög gott grip og eru furðu hljóðlátir og heyrist nánast ekkert í þeim inn í bílinn.

Sjálfskipting mætti vera betri

Ef það er einhver einn hlutur sem gæti kallað á endurbætur, þá er það hægvirk sjálfskiptingin – hún virkar frekar illa í beinskiptum ham. Sem betur fer er skiptingin mjúk og tölvustýring hennar virkar vel. Hún skiptir sér ekki of oft og þarf ekki að fara í gegnum mörg tannhjól til að ná út því afli sem óskað er eftir.

Þó að vélin í Badlands sé aðalmálið, fær bíllinn heldur betur flottar innréttingar. Dökkblátt eða appelsínugult áklæði kemur í stað þess látlausa svarta eða gráa sem er að finna í grunngerðunum og aðlaðandi brúnt leðuráklæði er valkostur. Þessir litir eru settir saman með plastskreytingum í hurðunum og á mælaborðinu, sem lýsa upp annars daufa innréttinguna og draga athyglina frá einfaldara hörðu plasti sem fylgir með.

Ford býður einnig upp á aukabúnað brúnt og svart leður og gervirúskinn sem er enn flottara.

Óháð áklæði eru framsætin með hitun og fjölda stillingarmöguleika, og þeir eru rafstýrðir. Sjálfvirk loftkæling er staðalbúnaður með tvöfalt svæði sem valkost.

Badlands er með hefðbundinn 8 tommu upplýsingaskjá eins og allir Bronco Sport ásamt Apple CarPlay, Android Auto og fjórum USB tengjum. Snertiskjárinn er bjartur, skarpur og snöggur og staðsettur þar sem auðvelt er að lesa og ná í hann.

Mælaborðið byggir á hefðbundnum analóg mælum ásamt 6,5 tommu miðjuskjá. Sá er með áberandi grafík, sem kemur flott út en þegar drif/GOAT-stilling er valin tekur það langan tíma fyrir kerfið að fletta í gegnum skjáinn.

Töfin á milli þess að snúa stilliskífunni og staðfesting hennar á skjánum er alltof löng, það er þó einnig vandamál sem við höfum fundið í öðrum bílum frá Ford.

Mjög samkeppnisfær jeppi

Fyrir utan að vera flott útgáfa samanborið við aðrar gerðir, þá er Bronco Sport Badlands mjög samkeppnishæfur jeppi. Það er svo sem ekki þéttsetinn básinn af svona jeppum í samkeppninni.

Hann er rýmri en Renegade og Compass Trailhawk gerðir Jeep, og býður upp á meiri kraft og betri meðhöndlun á meðan hann er að minnsta kosti jafn þeim í akstri í torfærum. En hann er líka dýrari, 4.000 dollurum meira en Renegade; 2.000 dollurum meira en Compass.

Þeir sem skáka Bronco Badlands í stærð og verði eru Jeep Cherokee Trailhawk, Subaru Outback XT og Toyota RAV4 TRD Off-Road, en vélar þeirra tveggja síðastnefndu eru varla samanburðarhæfar og ekki til stórræðanna í torfæruakstri.

Auðvitað er Bronco Sport, sérstaklega Badlands, nægum kostum búinn svo hann veki áhuga hjá þeim sem ekki stefna á neinar torfærur.

Svo, ef þú ert einfaldlega á höttunum eftir stílhreinum, öflugum litlum „crossover“, þá ættir þú að kíkja á Bronco Sport og sérstaklega Badlands. Jú, hann mun koma þér á óvart í torfæruakstri, en þú munt einnig njóta ánægjulegrar upplifunar í venjulegum þjóðvegaakstri, og færð þetta allt á sanngjörnu verði.

(grein á vef Autoblog)

Útlit: Badlands

Vél: Turbo 2.0L I4

Kraftur: 250 HP / 277 LB-FT

Skipting: 8 gíra sjálfskipting

Drifrás: Aldrif

Dráttur: 2.200 pund

Sæti: 5

Farmrými: 821 lítri

Eyðsla, lítrar 100 km: 13,5 innanbæjar / 10,9 á þjóðvegum / 12,3 blandaður akstur

Grunnverð: 34.315 dollarar